Фудбалерот на хрватската репрезентација, Петар Сучиќ, по поразот од Англија со 4:2 во првото коло од Групата Л на Светското првенство, изјави дека клучен фактор за неуспехот биле головите примени по прекини.
Хрватска двапати успеа да се врати резултатски во текот на првото полувреме, но на крајот остана без бодови на стартот од турнирот.
По натпреварот, Сучиќ оцени дека неговата селекција не била надиграна од противникот, туку дека решавачки биле ситните детали.
„Не би рекол дека тие беа подобри. Одигравме добро прво полувреме. На крајот примивме два гола по прекини. Игравме добар фудбал, но мора подобро да се браниме во такви ситуации“, изјави Сучиќ.
Тој додаде дека хрватските фудбалери покажале карактер, враќајќи се двапати во натпреварот, но дека третиот гол на Англија го променил текот на средбата.
„Двапати се враќавме, но по третиот гол ни беше многу тешко. Тој момент го реши натпреварот. Мора да останеме позитивни и да продолжиме понатаму. Ниту преостанатите два натпревари нема да бидат лесни“, нагласи Сучиќ.
Во вториот натпревар од групата, Гана со гол во завршницата ја совлада Панама со 1:0. Токму против Панама, Хрватска ќе го игра својот следен натпревар на Светското првенство.
