Судиите-поротници при Основниот кривичен суд Скопје од денеска започнуваат мирен протест, поради, како што наведуваат, долгогодишниот нерешен проблем со висината на дневниот надоместок и непостапувањето по нивните барања од страна на Министерството за правда и Судскиот совет.
Од Кривичниот суд информираат дека судиите-поротници нема да учествуваат на дел од судските расправи, поради што одредени рочишта ќе бидат одложени и презакажани во најкраток можен рок. За новите термини странките ќе бидат навремено известени.
Во известувањето доставено до Судот, судиите-поротници посочуваат дека нивниот дневен надоместок, кој изнесува меѓу 570 и 670 денари, со години не е зголемен, без оглед на бројот и сложеноста на предметите, како и времетраењето на нивниот ангажман.
Според нив, ваквиот надоместок не одговара на одговорноста што ја носи функцијата, ниту ги покрива основните трошоци поврзани со нивното присуство во судските постапки.
Тие наведуваат дека во изминатите две години повеќепати се обратиле до Министерството за правда и Судскиот совет со барање за решавање на овој проблем, но без конкретен резултат.
Од Основниот кривичен суд Скопје истакнуваат дека целосно ја препознаваат важноста на улогата на судиите-поротници, оценувајќи дека нивното учество е неопходно за законито и непречено водење на голем број судски постапки.
Судот изразува разбирање за нивното незадоволство и смета дека судиите-поротници заслужуваат достоинствен и соодветен надоместок, кој ќе ја одразува важноста на функцијата што ја извршуваат.
Воедно, од Судот очекуваат Министерството за правда во најкус рок да пристапи кон измена на Правилникот за надоместоците на судиите-поротници, со цел да се надмине настанатата состојба.
„Ова прашање треба да се реши преку институционален дијалог и взаемно разбирање, бидејќи неговото навремено разрешување е во интерес на судиите-поротници, судовите и, пред сè, на граѓаните кои очекуваат ефикасен и непречен правосуден систем“, наведуваат од Основниот кривичен суд Скопје.
