Пензионираниот судија Елјеса Алији испрати писмено барање во кое реагира на текст објавен на порталот на 30 септември 2026 година и бара негово повлекување и исправка.
Алији во дописот наведува дека упатува „најостар протест“ поради, како што тврди, изнесување фактички тврдења кои се невистинити, непроверени и штетни за неговата чест, углед и личен и професионален интегритет.
Неговата реакција се однесува на текстот со наслов „Пензионираниот судија осомничен за поткуп, Елјеса Алији, повторно се пријавил за претседател на Гостиварскиот суд“.
Алији особено го оспорува делот од објавата во кој се наведува дека повторно се пријавил за претседател на Основниот суд Гостивар.
„Категорично го оспорувам тврдењето дека повторно сум се пријавил за претседател на Основниот суд Гостивар, доколку за такво нешто не постои поднесена пријава од моја страна“, наведува Алији.
Тој тврди дека таквото тврдење било објавено без соодветна проверка и без наведување релевантни докази, посочувајќи дека станува збор за конкретен факт чија вистинитост, според него, може и мора да се провери.
Во дописот Алији се осврнува и на формулацијата „осомничен за поткуп“, употребена во насловот на текстот.
Според него, употребата на оваа квалификација без јасно наведување на процесниот статус, основот и релевантниот контекст создава негативна јавна перцепција и може да доведе до нарушување на неговиот углед, особено имајќи ја предвид неговата претходна функција во правосудниот систем.
Алији во реакцијата наведува и дека слободата на изразување и правото на информирање, според неговиот став, не подразбираат право на објавување непроверени факти, ниту ослободување од професионална и законска одговорност за последиците од известувањето. Тој посочува дека новинарското известување треба да се заснова врз проверени информации, со почитување на професионалните стандарди, достоинството на личноста и начелото на претпоставка на невиност.
Доколку не биде постапено по неговите барања, Алији најавува дека ќе ги искористи расположливите законски механизми за заштита на своите права и интереси.
„Доколку не постапите, ќе ги искористам сите расположливи законски механизми за заштита на моите права и интереси, вклучително и обраќање до надлежните органи и поведување соодветна судска постапка за утврдување на одговорност и надомест на причинетата нематеријална штета, доколку за тоа постојат законски услови“, наведува Алији во дописот.
