Судењето за „Монструм“ за петкратното убиство кај Смиљковското езеро пред 7 години почна со изјава на судијата за организиран криминал од Кривичниот суд Огнен Ставрев дека не го интересираат проблемите во СЈО и дека судењето ќе продолжи. Судијата Огнен Ставрев кој ја води повторената постапка за петкратното убиство на денешното рочиште појасни дека за него, до донесување на одлуката од Јовески, обвинители во предметот се Бубевски и Фетаи.
„Обвинителите кои седат пред мене за мене сѐ уште се обвинители во овој предмет сѐ до одлуката на државниот јавен обвинител, рече судијата Ставрев.
Објаснување за тоа што ќе се случува понатаму со случајот „Монструм“ на денешното рочиште побараа и родителите на убиените момчиња кои го замолија судијата да им даде објаснување дали предметот и понатаму ќе го застапуваат обвинителите на СЈО и дали ќе почне од почеток.
Судијата Ставрев појасни дека „Монструм“ нема да се врати на почеток бидејќи не се менува судија, туку обвинител, а во тој случај продолжува онаму каде што застанале.
