Општина Аеродром изрече казна од 88.000 евра на ЈП „Комунална хигиена – Скопје“, поради, како што наведуваат, континуирано нефункционирање, несоодветно собирање отпад и негрижа за јавната хигиена на територијата на општината.
„Ова не е политичка одлука, туку институционална санкција заснована на реални пропусти“, изјави в.д. градоначалникот Дејан Митески, потенцирајќи дека граѓаните постојано се жалат на преполни контејнери и нечистотија, иако редовно плаќаат за услугата.
Тој порача дека Аеродром нема да биде заложник на туѓа неспособност и најави засилен надзор и нови санкции ако не се подобри состојбата.
Од ЈП „Комунална хигиена – Скопје“ реагираа остро, нарекувајќи ја казната „евтин политички театар“ и градоначалникот Митески – „полу градоначалник без легитимитет“.
Тие појаснуваат дека работат според оперативен план усвоен од Советот на Град Скопје, кој е под контрола на ВМРО-ДПМНЕ и коалицијата ВЛЕН.
Во реакцијата, претпријатието наведува дека за кабастиот отпад од типот „гарнитури и мебел“, одговорноста е на локалните служби на општината и обвинуваат дека Митески сака да ја префрли вината за сопствената неажурност.
