На патот Прилеп–Битола вчераутро се случила тешка сообраќајна несреќа во која учествувале четири возила, а осум лица се повредени, информира Министерството за внатрешни работи.
Несреќата била пријавена на 5 август во 08:57 часот во СВР Битола. Во судирот учествувале патничко возило „цитроен“ со српски национални ознаки, управувано од 35-годишен државјанин на Србија, патничко возило „сеат“ со пробиштипски регистарски ознаки, товарно возило „фиат“ со струмички регистарски ознаки и патничко возило „фиат“ со скопски регистарски ознаки.
Според МВР, со тешки телесни повреди се здобиле возачите на „цитроенот“ и „сеатот“, како и четворица сопатници во српското возило. Повредите им биле констатирани во Клиничката болница во Битола.
Со телесни повреди се здобиле и возачот на скопскиот „фиат“, како и сопатник во возилото „сеат“, кои исто така биле прегледани во Клиничката болница во Битола.
Увид на местото на несреќата извршила увидна екипа на СВР Битола.
