Синдикатот на културата на Република Македонија (СКРМ) преку објава на социјалните мрежи упати остри критики до Уставниот суд, откако судиите донесоа одлука со која од октомври повторно ќе им се зголемат платите.
Од Синдикатот оценуваат дека е спорно тоа што уставните судии самите одлучувале за прашање кое директно влијае врз нивните лични примања, при што посочуваат дека платите на судиите ќе се пресметуваат врз основа на просечната бруто плата и повисоките коефициенти.
„Очигледно само за некои платата е привилегија, а за избраните е право кое самите си го носат“, наведуваат од СКРМ.
Во реакцијата се посочува и дека истите судии донеле решение за поведување постапка за оценување на уставноста и законитоста на Колективниот договор за култура во целост, документ со кој, како што наведуваат, се регулираат не само платите, туку и останатите работнички права на околу 2.400 вработени во културата.
Од Синдикатот сметаат дека ваквата состојба отвора дилема дали во државата постојат различни критериуми за вреднување на трудот.
„Оваа спротивност отвора суштинско прашање – дали постојат две мерила за вреднување на трудот: едно за оние кои создаваат културни вредности и со години се борат за основни права и друго за оние кои самите одлучуваат за сопственото материјално подобрување“, се наведува во реакцијата на Синдикатот на културата.
