Седумдесет станови за социјално ранливи категории на граѓани во Гостивар, чекаат на распределување. Зградата покрај Кејот на Вардар, близу големиот мост е целосно готова, а извршен е и технички прием. Но , како ќе се делат истите?
Министерот за транспорт и врски Горан Сугарески, одговарајќи на новинарско прашање при неговата посета на Гостивар појасни дека наскоро треба да се утврдат критериумите, кои треба да се во склад со новата методологија.
– Зградата веќе го помина техничкиот прием и таа е вселива. Треба да се распише оглас согласно новата методологија за рангирање која е предвидена со новиот закон за социјална заштита. Во него се утврдени нови критериуми, односно нови категории граѓани ќе можат да аплицираат за социјален стан. Очекувам во најкус рок да биде и формирана комисијата која ќе работи на оценување на апликациите, рече министерот Сугарески.
