Германската влада најави пакет итни мерки за ублажување на последиците од рекордно нискиот водостој на реките, кој сериозно ги нарушува транспортот и синџирите на снабдување.
Поради падот на нивото на Рајна, Дунав и Елба, предизвикан од серијата топлотни бранови, дел од товарниот сообраќај ќе биде пренасочен кон патиштата и железницата, а паралелно ќе се работи и на долгорочна адаптација на инфраструктурата.
Германските хемиски компании веќе предупредија дека би можеле да го намалат производството поради отежнатото снабдување и повисоките транспортни трошоци. Поради нискиот водостој, товарните бродови не можат да превезуваат полн капацитет, што дополнително ги зголемува трошоците и го оптоварува стопанството.
Според проценките на Институтот за светска економија во Кил, економијата во третиот квартал би можела да загуби меѓу една и две милијарди евра, што би значело намалување на бруто-домашниот производ за 0,1 до 0,2 проценти.
Меѓу краткорочните мерки, германскиот министер за транспорт најави можност привремено да се укине забраната за движење на камиони во недела и за време на празници за одредени категории стока. Тој истакна дека веќе разговарал со покраинските власти и дека постои подготвеност мерката да биде воведена додека трае кризата.
Дополнително, државната компанија за управување со автопатиштата добила задача да ги минимизира застојите поради патни работи, а на еден важен канал е одложена реконструкцијата на преводница за да не се попречува пловидбата.
Поголема улога во транспортот ќе има и железницата. Компанијата DB Cargo ќе преземе дел од товарот што досега се превезувал по реките и ќе организира дополнителни транспортни линии низ Европа.
Иако стопанските комори ги поздравија мерките, здружението на патни превозници предупреди дека укинувањето на забраната за возење нема да ги надмине ограничувањата поврзани со работното време и задолжителниот одмор на возачите.
