Сузбиена криминална група за криумчарење и корупција: Одземени над 100.000 евра, лекови, суплементи и цигари

Криминална група инволвирана во криумчарење стоки и коруптивни кривични дела е сузбиена во полициска акција спроведена на повеќе локации во Скопје, Тетово и Гевгелија, соопшти Министерството за внатрешни работи. Против осум лица е поднесена кривична пријава, а при претресите биле одземени над 100.000 евра, лекови, суплементи, цигари и други предмети.

Акцијата била спроведена на 21 септември 2026 година под раководство на Основното јавно обвинителство за гонење на организиран криминал и корупција. Полициски службеници од Одделот за сузбивање на организиран и сериозен криминал, во координација со Одделот за специјални полициски операции – Единицата за брзо распоредување, постапувале врз основа на наредби издадени од Основниот кривичен суд Скопје.

— реклама —

При претресите биле пронајдени и одземени над 100.000 евра, 16 плочки во златна боја, цигари и тутун без акцизни маркички, поголема количина лекови и суплементи за кои постојат сомненија дека биле нелегално внесени во државата, повеќе мобилни телефони и други предмети. Во акцијата шест лица биле лишени од слобода.

Единицата за финансиски криминал при Секторот за криминалистички истраги во Одделот за сузбивање на организиран и сериозен криминал до Основното јавно обвинителство за гонење на организиран криминал и корупција поднела кривична пријава против М.С. (52) од Тетово, З.С. (42) од Гевгелија, А.С. (38) од Скопје, Б.Љ. (46) од Тетово, Е.А. (55) од Скопје, Д.Џ. (46) од Тетово, како и Б.А.К. (34) и С.С. (42), двајцата од Република Турција.

— реклама —

Тие се пријавени за повеќе кривични дела, меѓу кои „криумчарење“, „прикривање на стоки кои се предмет на криумчарење“, „избегнување на плаќање акциза“, „примање поткуп“, „давање поткуп“, „производство и пуштање во промет штетни средства за лекување“ и „перење пари и други приноси од казниво дело“.

— реклама —

Според МВР, во периодот од 2024 до 2026 година, првопријавениот М.С. организирал нелегално внесување и складирање акцизна стока, односно цигари и тутун, како и нивна понатамошна препродажба.

Во рамките на активностите, преку давање поткуп на царинскиот службеник З.С., на членовите на групата им било овозможено непречено пренесување акцизна стока преку царинската линија без пријавување и плаќање на законските давачки. Исто така, било овозможено нелегално внесување лекови и суплементи наменети за продажба.

Со дел од утврдените дејствија, според МВР, била предизвикана материјална штета на државниот буџет поради избегнување царински давачки, акциза и данок на додадена вредност во значителен износ.

Од Министерството дополнуваат дека со пуштањето во промет без соодветно одобрение, упатство и рецепт, дел од производите претставувале опасност за здравјето на луѓето.