Вештачката интелигенција им нуди на земјите во развој единствена можност за забрзан економски и технолошки напредок, при што за само една деценија би можеле да постигнат развој за кој вообичаено би биле потребни околу сто години, оценува Светска банка во најновиот извештај.
Според институцијата, брзото прифаќање и примена на AI-технологиите ќе биде клучно за земјите со ниски и средни приходи да не ја пропуштат оваа историска можност.
Проценките покажуваат дека вештачката интелигенција би можела во текот на оваа деценија да го зголеми потенцијалниот годишен економски раст на земјите во развој од 4,1 на 4,9 проценти. За споредба, во развиените економии се очекува дополнителен раст меѓу 1,2 и 3,6 проценти.
Наместо да инвестираат огромни средства во развој на сопствени големи AI-модели, Светска банка препорачува овие држави најпрво да ги применат постојните решенија и да ги приспособат на локалните потреби, а потоа постепено да развиваат сопствени технологии.
Во извештајот се нагласува дека придобивките од вештачката интелигенција не бараат секогаш големи инвестиции. Посебно се издвојува потенцијалот на т.н. „мала AI“, односно апликации што можат да функционираат и во средини со ограничен пристап до интернет и електрична енергија.
Како успешни примери се наведуваат AI-решенија во Гана, каде математички тутор достапен преку СМС-пораки постигнал резултати споредливи со осуммесечен курс, во Бангладеш, каде систем за дијагностицирање дијабетична ретинопатија го зголемил бројот на дневни прегледи за 40 проценти, како и во Индија, каде AI-прогнозите им помогнале на земјоделците да ги намалат трошоците и да ја зголемат ефикасноста.
Светска банка оценува дека вештачката интелигенција може да помогне и во надминување на недостигот од стручен кадар во здравството, образованието, земјоделството и јавната администрација.
Воедно, се посочува дека ризикот од автоматизација на работните места е помал во земјите во развој отколку во развиените економии. Сепак, организацијата предупредува дека AI носи и ризици, како што се продлабочување на јазот меѓу богатите и сиромашните земји, концентрација на технолошката моќ кај мал број компании и зголемена зависност од ограничен број технолошки добавувачи.
Поради тоа, Светска банка ги повикува земјите во развој паралелно со воведувањето на AI-технологиите да воспостават и соодветни механизми за заштита, со цел максимално да ги искористат придобивките и да ги намалат потенцијалните негативни последици.
