По повод Светската недела на доењето, која годинава се одбележува под мотото „Доење за одржлив почеток во животот – да го зајакнеме тоа што функционира“, Министерството за здравство ја истакна важноста на доењето како најприроден и најбезбеден начин на исхрана на новороденчињата и доенчињата.
Од Министерството посочуваат дека мајчиното млеко ги обезбедува сите потребни хранливи материи за правилен раст и развој, придонесува за зајакнување на имунитетот, го намалува ризикот од бројни заболувања и има позитивно влијание врз здравјето и на детето и на мајката.
Во согласност со препораките на Комитетот за доење, Светската здравствена организација (СЗО) и УНИЦЕФ, се препорачува бебињата да се хранат исклучиво со мајчино млеко во првите шест месеци од животот, а потоа доењето да продолжи заедно со воведување соодветна дополнителна исхрана до две години или подолго, зависно од потребите на детето и одлуката на мајката.
Министерството за здравство нагласува дека останува посветено на унапредување на политиките за поддршка на доењето преку зајакнување на капацитетите на здравствените установи, едукација на здравствените работници и обезбедување континуирана поддршка за бремените жени, мајките и нивните семејства.
Воедно, по повод Светската недела на доењето, Министерството упати повик до здравствените работници, институциите, работодавачите, семејствата и целата заедница за заедничка поддршка на мајките, истакнувајќи дека создавањето услови за успешно доење претставува инвестиција во здравјето на сегашните и идните генерации.
