Јован Деспотовски, долгогодишен функционер и кадар на СДСМ, со јавно обраќање изрази силно разочарување од одлуките на актуелното раководство на партијата, оценувајќи дека токму неговата матична партија го оставила „целосно без зборови и коментар“.
Во пораката, Деспотовски нагласува дека по три децении политички ангажман најмалку очекувал ваков однос од СДСМ, потенцирајќи дека во сите свои јавни настапи бил умерен и воздржан, дури и во ситуации кога, како што вели, имало основ за остар и директен став.
„Во сите јавни настапи сум бил максимално умерен, дури и во ситуации и за луѓе кои апсолутно заслужиле остар став. Ако таа умереност сега станува закана за актуелниот партиски врв, тогаш СДСМ има многу поголем проблем отколку што и мислиме“, наведува Деспотовски.
Тој во пораката испраќа и јасна критика кон персонализацијата на партијата, нагласувајќи дека СДСМ низ историјата имала и ќе има многу поголеми личности од кој било актуелен претседател.
„СДСМ имала и ќе има многу поголеми личности од актуелниот претседател. И никој од нив никогаш не се ставил над партијата, над нашето семејство. Тоа не е СДСМ, ниту некогаш ќе биде“, порачува тој.
Во завршницата, Деспотовски директно му се обраќа на актуелниот лидер на СДСМ, Венко Филипче, со јасна лична порака дека нема да дозволи неговиот долгогодишен ангажман да биде обезвреднет со една политичка одлука.
„Со една одлука не можеш, ниту ќе дозволам да избришеш 30 години работа, љубов и жртва“, пишува Деспотовски.
Објавата на поранешниот функционер се толкува како уште еден јавно изразен знак за внатрепартиските тензии во СДСМ, во период кога партијата се соочува со сериозни предизвици, внатрешни преиспитувања и пад на довербата кај дел од членството и јавноста.
