По тешката ноќ во која пожарот се приближи до повеќе населени места во Прилепско, утрово ситуацијата е стабилизирана, а селата Бонче, Подмоље и Лопатица се безбедни, информира директорот на Дирекцијата за заштита и спасување, Стојанче Ангелов.
Тој упати благодарност до прилепските пожарникари, кои во текот на ноќта со тактика на контрапожар успеале да го запрат ширењето на огнот и да спречат тој да стигне до селото Подмоље.
„Пожарната линија, која беше видлива од регионалниот пат Прилеп-Битола, е целосно изгасната. Активен е само уште еден крак високо над селото Бонче“, изјави Ангелов.
Тој објасни дека пожарникарите направиле контрапожар над противпожарната пресека во близина на Лопатица, која претходно била изработена со механизација. На тој начин успеале да го прекинат огнот и да спречат негово преминување преку пресеката кон Подмоље.
Ангелов упати благодарност и до тимот за брз одговор на ДЗС, составен од пожарникари од Битола и Кочани, кои во текот на ноќта се искачиле високо на ридовите околу селата и гаснеле повеќе километри долга огнена линија.
Сепак, опасноста сè уште не е целосно отстранета. Ангелов предупреди дека порастот на температурите околу пладне може да предизвика повторно активирање на огнот на одредени делови од пожариштето.
На терен остануваат прилепски пожарникари, како и екипите со двете возила „Пинцгауер“, кои ќе ја следат состојбата и ќе интервенираат доколку дојде до реактивирање на пожарот.
Според Ангелов, пожарот од мариовската страна е изгаснат или ставен под целосна контрола. Тој изрази оптимизам дека денеска би можел да биде зададен „последниот удар“ на најголемиот пожар во досегашниот дел од сезоната.
