Тешка трагедија во Турција: Најмалку 16 загинати во експлозија во фабрика за челик, се трага по затрупани лица

Најмалку 16 лица загинаа во експлозија во фабрика за челик во западниот дел на Турција, потврди претседателот на земјата, Реџеп Таип Ердоган, по седницата на Владата.

— реклама —

Експлозијата се случила во понеделникот наутро во фабриката за железо и челик „Хабаш“ (Habas), во округот Алиага, провинција Измир, соопштија од канцеларијата на гувернерот.

Според првичните сознанија, несреќата се случила кога попуштил мостовски кран, кој потоа паднал во електролачната печка за време на процесот на леење течен челик.

— реклама —

На снимките емитувани од локалните телевизии се гледаат големи облаци од прав како се креваат над фабричкиот комплекс по експлозијата.

— реклама —

Повредените се пренесени во неколку болници во регионот, а според податоците на надлежните служби, тројца од 14-те повредени се во тешка состојба.

Спасувачките екипи продолжуваат со потрагата по најмалку десет лица, за кои се верува дека се затрупани под урнатините по експлозијата.

— реклама —

Претседателот Ердоган изјави дека сите за кои ќе се утврди дека се одговорни за трагедијата, односно дека со свои пропусти придонеле за несреќата, ќе сносат одговорност.