Тешкиот пожар што денеска околу пладне избувна во атарот на селото Милетино, Општина Брвеница, е ставен под контрола. Во гаснењето учествувале тетовските пожарникари, со поддршка од два „ер-трактори“ на Дирекцијата за заштита и спасување.
Директорот на Центарот за управување со кризи, Стојанче Ангелов, заедно со в.д. градоначалникот на Општина Брвеница, Роберт Милошески, информираа за интервенцијата на терен.
Милошески посочи дека пожарот бил пријавен околу 12 часот од локалното население, по што веднаш била побарана помош од противпожарната единица.
„Ни го пријавија пожарот некаде околу дванаесет часот напладне од населението и побаравме брза реакција. Побаравме помош од локалната пожарникарска единица. Реагираа брзо, го локализираа пожарот, но се префрли во густата шума. Таму не успеавме поради непристапниот терен. Благодарение на директорот, ни ги прати тракторите кои успеаја и го локализираа пожарот“, изјави Милошески.
Ангелов ја пофали брзата реакција на локалните власти и пожарникарите, нагласувајќи дека биле преземени сите потребни чекори за справување со пожарот.
„Вака треба да се менаџираат и гасат вакви комплексни пожари, бидејќи сте направиле сè што е во ваша моќ. Сте побарале пожарникари, сте побарале дополнителна помош, ер-трактори, така што сега е ставен под контрола“, рече Ангелов.
Тој сепак предупреди дека во текот на ноќта постои можност пожарот повторно да се разгори поради ветерот, поради што состојбата ќе продолжи да се следи.
