Мотоциклист од Струга се здобил со тешки телесни повреди во сообраќајна несреќа што се случила вчера попладне во Струга, информираат од Министерството за внатрешни работи.
Според МВР, на 13 јуни 2026 година во 15:05 часот во ОВР Струга било пријавено дека на крстосницата од улиците „Ѓуро Салај“ и „Димче Ковачески“ се случила сообраќајна несреќа помеѓу патничко возило „Рено“ со скопски регистарски ознаки, управувано од В.А.Ш. (22), државјанка на Полска, и мотоцикл „БМВ“ со тетовски регистарски ознаки, управуван од В.К. (46) од Струга.
Во несреќата, мотоциклистот се здобил со тешки телесни повреди, кои биле констатирани во Специјалната болница „Свети Еразмо“ во Охрид.
За настанот бил известен јавен обвинител, а увид на местото на несреќата извршила екипа за увид од ОВР Струга. Се преземаат мерки за целосно расчистување на околностите под кои се случила несреќата.
