Канада во следниот период може да увезе повеќе од 30.000 електрични и хибридни автомобили произведени во Кина, а меѓу компаниите што најмногу би можеле да имаат корист од новите правила е Тесла.
Канада и Кина во јануари објавија „ново стратешко партнерство“, со кое е овозможен увоз на 49.000 кинески електрични возила со царинска стапка од 6,1 отсто, односно стапка според режимот за најповластена нација.
Во првиот период, кој траеше од 1 март до 31 август, во Канада биле увезени вкупно 15.603 хибридни и електрични возила. Тоа е значително помалку од дозволената квота од 24.500 возила, односно останале неискористени 8.897 места.
Вториот период започна на 1 септември и предвидува дополнителен увоз на 24.500 кинески возила. Бидејќи во него може да се пренесе и целата неискористена квота од првиот период, вкупно може да бидат увезени до 33.397 возила.
Канадските власти засега немаат објавено детални податоци за увозот според производителите, но според Automotive News, Tesla се смета за еден од најголемите корисници на новите правила.
Компанијата во Канада го увезува Model 3 Premium, произведен во Кина, чија почетна цена изнесува 39.490 канадски долари, односно околу 28.532 американски долари.
Покрај Tesla, од новата можност досега корист имале и Lincoln, Lotus и Polestar. Lincoln во август започнал со увоз на моделот Nautilus Hybrid, а се претпоставува дека од кинеското производство потекнуваат 259 продадени хибридни возила.
Во меѓувреме, на канадскиот пазар се подготвуваат да влезат и големите кинески производители. Возилата на BYD, Chery и Geely се во процес на хомологација, а нивните модели веќе биле забележани за време на тестирања во Канада.
Со тоа, канадскиот пазар би можел да стане значајно ново извозно подрачје за кинеските производители на електрични и хибридни автомобили.
