Дваесет и осумгодишен жител на Тетово бил лишен од слобода откако, според пријавата, агресивно се однесувал во семејниот дом, кршел покуќнина, физички ја нападнал својата мајка и со нож ѝ се заканувал на сопругата.
Од СВР Тетово информираат дека на 21 јуни околу 19:00 часот полициски службеници го привеле А.И. (28) од Тетово.
Претходно, неговата 51-годишна мајка пријавила во СВР Тетово дека околу 12:00 часот, во семејниот дом, нејзиниот син почнал агресивно да се однесува и да ја крши покуќнината, откако таа одбила да му даде пари во износот што го барал.
Според пријавата, по инцидентот тој со нож ѝ се заканил на својата 24-годишна сопруга, а потоа физички ја нападнал и својата мајка.
Осомничениот е задржан во полициска станица, а по целосно документирање на случајот ќе следува соодветен поднесок.
