Претседателот на Казахстан, Касим-Жомарт Токаев, за време на средбата со рускиот претседател Владимир Путин во Омск предложи војната во Украина да биде ставена во мирување и повторно да се активира форматот на мировните преговори познат како „Истанбул 2.0“.
Токаев оцени дека разговорите што се одржаа во Истанбул во мај и јули 2025 година дале значајни резултати, меѓу кои и договор за размена на заробеници, и смета дека тие можат да бидат добра основа за продолжување на мировниот процес. Според него, со гаранции од големите сили, вклучително и Русија, би можело повторно да се отвори патот кон траен мир.
Тој нагласи дека нема намера да биде посредник меѓу Москва и Киев, оценувајќи дека Русија е доволно силна држава за самостојно да ги води разговорите.
Казахстанскиот претседател изјави дека добива бројни пораки од Европа и од Соединетите Американски Држави во врска со војната и решил своето мислење директно да му го пренесе на Путин. Според него, никој во овој момент нема јасен одговор како конфликтот да заврши, бидејќи ставовите на двете страни се различни, но постои можност борбите привремено да бидат запрени.
Токаев истакна дека најголемата цена ја плаќаат младите луѓе од двете земји и порача дека насилството мора да запре, бидејќи продолжувањето на војната им оди во прилог на противниците и на Русија и на Украина.
Тој нагласи дека конфликтот го смета за меѓудржавна војна, а не за граѓански судир, додавајќи дека Казахстан отсекогаш ја почитувал Украина.
Воедно, Токаев оцени дека Путин покажал дипломатска флексибилност на неодамнешната средба на Алјаска и повтори дека Астана останува посветена на стратешкото партнерство и сојузничките односи со Русија.
