Над еден тон марихуана вечерва е пронајдена и запленета во магацин во скопската населба Бутел, при акција на Бирото за јавна безбедност, преку Одделот за криминалистичка полиција. Директорот на БЈБ, Сашо Тасевски, соопшти дека акцијата е координирана со Обвинителството, а досега уапсено е едно лице кое ќе се гони за недозволена трговија на марихуаната.
„Во рамките на засилените мерки во борбата против недозволената трговија со дрога во координација и насоки со ОЈО Кавадарци во моментов спроведува акција на подрачјето на град Скопје, при што во магацин во населба Бутел се пронајдени и одземени 12 палети во кои има еден тон и двесте и четириесет килограми (1240 кг) наркотична дрога марихуана спакувана во полиетиленски вакумирани пакувања и црни полиетиленски вреќи“, информираше директорот Тасевски.
Како што информираат од БЈБ, истрагата е во тек со цел утврдување и откривање на други лица инволвирани во случајот на недозволена трговија со марихуана.
фото: Архива
