Тони Надал: Верувам дека ова е последната сезона на Новак Ѓоковиќ

Шпанскиот тениски тренер Тони Надал смета дека крајот на блескавата кариера на Новак Ѓоковиќ е сè поблиску и дека актуелната сезона би можела да биде последна за српскиот тенисер.

Легендарниот тренер и чичко на Рафаел Надал, во пресрет на АТП турнирот на Мајорка, зборуваше за повеќе тениски теми, а особено се осврна на Ѓоковиќ и неговата потрага по уште еден голем трофеј.

— реклама —

„Пред Ролан Гарос ме прашаа дали го гледам Ѓоковиќ како освојувач на турнирот и одговорив негативно. Не затоа што не го ценам, туку затоа што времето минува. Кога треба да играте пет сета на секои два дена, закрепнувањето повеќе не е исто. Ниту патувањата не се исти, пристигнувате подоцна и сето тоа влијае на играта“, изјави Тони Надал.

— реклама —

Тој смета дека Ѓоковиќ продолжува да се натпреварува исклучиво поради најголемите предизвици.

„Тој игра за да се обиде да освои уште еден грен-слем. Во спротивно, која е поентата за човек кој освоил сè? Затоа мислам дека ја гледаме неговата последна сезона“, порача шпанскиот стручњак.

— реклама —

Новак Ѓоковиќ наскоро ќе настапи на Вимблдон, кој започнува на 29 јуни, а останува неизвесно дали тоа ќе биде неговиот последен настап на тревните терени во Ол Ингланд Клубот.

— реклама —

Тони Надал направи и споредба меѓу Новак Ѓоковиќ и неговиот внук Рафаел Надал, нагласувајќи дека токму љубовта кон тенисот ги одржала на самиот врв толку долго.

„И Рафаел и Ѓоковиќ останаа релевантни затоа што го сакаат тоа што го прават. Го сакаат тенисот и имаат желба секогаш да го дадат најдоброто од себе“, истакна Тони Надал.