Топлотните бранови ја зголемија продажбата на кинески клима-уреди во Европа

Екстремните топлотни бранови што летово ја зафатија Европа предизвикаа нагло зголемување на побарувачката за системи за ладење, а најголеми добитници од овој тренд се кинеските производители на клима-уреди.

— реклама —

Поради температурите што во многу земји редовно надминуваат 38 Целзиусови степени, граѓаните масовно купуваат клима-уреди. Во бројни градови се формираат долги редици пред продавниците за бела техника, а дел од купувачите патуваат и во соседните места за да пронајдат слободен уред.

Овој бран на побарувачка им донесе значителен раст на продажбата на кинеските компании Midea, Gree и Haier, и тоа во период кога Европската Унија размислува за воведување дополнителни царини за низа кинески производи.

— реклама —

Пекинг веќе го искористи овој тренд, при што државната агенција „Синхуа“ оцени дека Европа е премногу жешка за да си дозволи нови царински бариери кон кинеските производи, тврдејќи дека таквите мерки најмногу би ги погодиле европските потрошувачи.

— реклама —

Во исто време, Брисел и Пекинг се подготвуваат за нови разговори околу трговскиот дефицит, кој минатата година достигна речиси 360 милијарди евра во корист на Кина.

Иако европските домаќинства традиционално имаа помалку клима-уреди од другите делови на светот, климатските промени значително ја менуваат оваа слика. Еден од примерите е компанијата Midea, која разви пренослив клима-уред специјално наменет за европските станови и сезонава продаде повеќе од 200.000 вакви уреди, двојно повеќе отколку лани.

Според аналитичарите, Европската Унија останува еден од најперспективните пазари за индустријата за климатизација. Во моментов, само околу 20 проценти од европските домови имаат клима-уред, во споредба со околу 90 проценти од домаќинствата во САД, поради што експертите очекуваат побарувачката да продолжи да расте и во наредните години.