Две лица го загубија животот, а едно лице се наоѓа во критична состојба по тешка сообраќајна несреќа што се случила на експресниот пат Прилеп–Градско, пред клучката кај Кавадарци.
Според првичните информации, во несреќата директно се судриле две патнички возила. Во едниот автомобил животот го загубиле маж и жена, додека во другиот автомобил се наоѓал 39-годишен жител на Прилеп, кој со тешки повреди итно бил пренесен во болницата во Кавадарци.
На местото на несреќата веднаш интервенирале екипи на Итната медицинска помош, полициски службеници и пожарникари, кои го извлекувале тешко повредениот од возилото.
Увидната екипа на Министерството за внатрешни работи и натаму работи на утврдување на причините за несреќата.
Експресниот пат Прилеп–Градско беше пуштен во употреба минатото лето, а за само неколку месеци на оваа делница животот го загубија седум лица, додека повеќе од десетмина беа тешко повредени во сообраќајни несреќи.
