Трагедија на пат кон свадба: Загина четиричлено семејство со две деца во автобуска несреќа во САД

Трагична сообраќајна несреќа во американската сојузна држава Вирџинија одзеде пет животи, меѓу кои и четиричлено семејство кое патувало на семејна свадба во Јужна Каролина.

Во несреќата загинале Дмитри Донцев (45), неговата сопруга Екатерина Донцева (44) и нивните две деца, Емили и Марко. Во судирот животот го загубила и 25-годишната Присила Мафалда од Масачусетс.

— реклама —

Според истрагата, туристички автобус предизвикал верижен судир на автопатот И-95 во округот Стафорд, откако возилата претходно забавиле поради патни работи. Автобусот најпрво удрил во теренец „Шевролет Субурбан“, кој потоа налетал на автомобилот „Акура“, во кој се наоѓало семејството Донцев.

— реклама —

Повеќе лица биле повредени и пренесени во болница. Едно лице било во критична состојба, додека најголем дел од повредените биле пуштени на домашно лекување по укажаната медицинска помош.

Возачот на автобусот, 48-годишниот Џинг С. Донг од њујоршкиот Статен Ајленд, е обвинет за две кривични дела убиство од небрежност. Обвинителството соопшти дека се можни и дополнителни обвиненија по завршувањето на истрагата.

— реклама —

Американските власти наведуваат дека автобусот се движел со голема брзина, а првичните наоди укажуваат дека сопирањето било минимално непосредно пред ударот.

— реклама —

Несреќата ја истражува и Националниот одбор за безбедност во сообраќајот, кој ќе утврдува дали фактор во трагедијата било и познавањето на англискиот јазик од страна на возачот.

Семејството Донцев се преселило од Молдавија во САД во 2008 година и живеело во Масачусетс. Според нивни роднини, Екатерина со денови подготвувала домашни слатки за свадбената прослава на која никогаш не стигнале.