Во Ханти-Манси автономниот округ во Западен Сибир, Русија, во пожар во приватна куќа загина седумчлено семејство, меѓу кои четири деца, соопштија локалните власти.
Пожарот избувнал во текот на ноќта во селото Високи, во градот Мегион. Според гувернерот на регионот Руслан Кухарук, семејството не успеало да се спаси пред огнената стихија да ја зафати куќата.
Прелиминарните информации укажуваат дека причината за пожарот е поврзана со непочитување на противпожарните правила при користење електрични уреди. Огнот бил пријавен во раните утрински часови, а кога пристигнале пожарникарите веќе бил во развиена фаза и постоела опасност да се прошири на соседни објекти.
Пожарот бил локализиран по околу два часа, при што изгорела површина од 142 квадратни метри. Во гаснењето учествувале 16 пожарникари со четири возила.
