Тешко семејно злосторство денеска го потресе Велико Градиште, Србија. Според информациите на српските медиуми, службеник на граничната полиција, Б.К., со пиштол ги убил својот зет и 19-годишната внука, а потоа си го одзел животот.
Во пукањето биле повредени и неговата сестра и мајката на зетот. Тие се пренесени на лекување, а лекарите се борат за нивните животи.
Според досегашните информации, трагедијата наводно започнала по семејна расправија околу имотни прашања. Злосторството се случило во куќа на слепа улица во Велико Градиште.
Настанот прва го забележала млада жена која минувала со велосипед во близина. Таа видела жена како лежи неподвижно пред куќата и веднаш ги известила своите родители.
На местото на трагедијата полицијата пронашла три тела и две повредени жени. На терен се екипи на итната медицинска помош и полицијата, како и двајца обвинители од Вишото јавно обвинителство во Пожаревац.
