Најмалку четири лица загинаа, а 13 се повредени во тешка сообраќајна несреќа што денеска се случи во селото Квасилов, во Ровенската област во Украина, каде што се судрија воз и минибус.
Според информациите на украинските власти, несреќата се случила околу 13:55 часот по локално време. На местото веднаш пристигнале полициски екипи и службите за итна помош, кои работат на утврдување на причините за трагедијата.
Од Државната служба за вонредни состојби соопштија дека во несреќата се повредени 13 лица, а регионалните власти информираат дека меѓу повредените има и деца.
Поради несреќата, железничкиот сообраќај на оваа делница е привремено ограничен, додека надлежните служби вршат увид и ги расчистуваат околностите под кои дошло до судирот.
