Трамп го засилува притисокот врз Зеленски, Виткоф заминува на средба со Путин

Американскиот претседател Доналд Трамп сè посилно притиска врз украинскиот претседател Володимир Зеленски да го прифати американскиот предлог за мир, додека специјалниот пратеник на Белата куќа, Стив Виткоф, се подготвува за разговори со украинскиот лидер и европските претставници во Осло, по што треба да отпатува во Москва на средба со рускиот претседател Владимир Путин.

Според „Аксиос“, повикувајќи се на американски претставник, целта на средбите во Осло е усогласување на предлогот за завршување на војната во Украина, кој потоа би ѝ бил претставен на Русија. На разговорите се очекува да учествуваат и норвешкиот премиер Јонас Гар Стере, претставници на Велика Британија, Франција, Германија и Полска, како и претставници на Европската Унија и НАТО.

— реклама —

„Њујорк тајмс“ објавува дека Трамп станал поодлучен во барањето Зеленски да го прифати американскиот предлог. Според весникот, американскиот претседател го убедува украинскиот лидер дека обидот за задржување на Донбас „не е вреден за напорот“, а тврди и дека Украина би можела да има финансиска корист доколку се откаже од приговорите на договорот, кој, според наводите, во голема мера е составен според руските услови.

Американскиот претставник посочил дека Виткоф во Москва планира да разговара со Путин и да ги претстави предлозите изработени во соработка со Украина и европските партнери. Советникот на Трамп, Џаред Кушнер, нема лично да присуствува на средбата во Осло поради грип, но ќе се вклучи преку видеоврска.

— реклама —

Разговорите се надоврзуваат на претходните средби во клубот „Шел Беј“, во близина на Мајами, каде што Зеленски се согласил да разгледа и да доработи повеќе предлози за сеопфатен и траен мировен договор. Американски, украински и европски претставници работеле на нив во текот на изминатата недела, а Виткоф и Кушнер во неделата разговарале со Зеленски за напредокот и следните чекори.

— реклама —

Преговорите ќе се одвиваат во две насоки: обезбедување суверена, безбедна и просперитетна иднина за Украина, со безбедносни гаранции, европска интеграција и повоена економска рамка, како и изработка на сеопфатен предлог за Русија, кој би ги опфатил условите за завршување на војната и долгорочната безбедносна архитектура меѓу Русија и Европа.

Американската делегација планира да го отвори и прашањето за ослободување на Стивен Хабард, пензиониран американски наставник кој е во притвор во Русија и за кого Вашингтон смета дека е незаконски задржан.

„Претседателот Трамп наложи интензивен процес за изработка на сеопфатен мировен предлог со Украина и Европа, а следниот чекор е да се провери дали таа работа може да послужи како основа за сериозни преговори со Русија“, изјавил американскиот претставник.

Тој додал дека разговорите сè уште траат и дека останува многу работа, но оти целта на Вашингтон е завршување на војната и создавање услови за траен мир во интерес на Украина, Русија, Европа и САД.