Американската администрација предводена од претседателот Доналд Трамп најави нов пакет трговски мерки со кои би бил воведен дополнителен царински товар за увоз од 60 земји и економии, меѓу кои и Европската Унија, Велика Британија, Канада, Мексико и Тајван.
Предлогот е поднесен од Канцеларијата на американскиот трговски претставник (USTR) во рамки на истрага за нефер трговски практики според член 301 од американското законодавство.
Според предложените мерки, за увоз од Европската Унија и уште неколку земји би се вовела дополнителна царина од 10 проценти. На листата се наоѓаат и Канада, Еквадор, Индонезија, Мексико, Пакистан, Аргентина, Бангладеш, Камбоџа, Ел Салвадор, Гватемала, Малезија, Тајван и Велика Британија.
За останатите 45 земји опфатени со истрагата се предлага уште повисока царинска стапка од 12,5 проценти.
Американскиот трговски претставник Џејмисон Грир изјави дека неуспехот на голем број трговски партнери да го спречат увозот на стоки произведени со принудна работа создава нефер услови за американските работници и компании.
„Неуспехот на нашите најважни трговски партнери да се справат со увезената стока произведена со принудна работа е неприфатлив. Тоа создава услови во кои американските работници се принудени да се натпреваруваат под нееднакви правила“, изјави Грир.
Во исто време, USTR најави и посебен механизам за текстилната индустрија, кој би овозможил одредени количини текстил и облека да влегуваат на американскиот пазар со пониски царински стапки.
Мерките доаѓаат во период кога администрацијата на Трамп се обидува повторно да воведе дел од царините што беа поништени од Врховниот суд на САД во февруари годинава.
Пред неколку дена Вашингтон предложи и царини од 25 проценти за голем број производи од Бразил, а во тек се и истраги за индустрискиот вишок кај повеќе трговски партнери, меѓу кои и Кина.
Од предложените царини би биле изземени одредени производи како енергенси, ретки минерали, фармацевтски производи, кафе, дел од земјоделските производи, органски хемикалии и делови за авиони.
