Трамп синоќа најави дека денес ќе излезе со “важно соопштение” за американскиот “shutdown”, кој речиси цел месец делумно ја парализира федерална администрација.
“Ќе имам важно соопштение за хуманитарната криза на нашата јужна граница утре попладне во 15:00 часот од Белата куќа”, објави претседателот Доналд Трамп.
Трамп и претседателката на Демократската партија во Претставничкиот дом, Ненси Пелоси, веќе неколку седмици не успеваат да се согласат околу буџетскиот ќор-сокак кој започна на 22 декември и има влијание врз околу 800.000 федерални вработени кои веќе не ја примаат платата.
Во срцето на буџетскиот конфликт е ѕидот на Доналд Трамп што тој сака да се подигне на границата со Мексико, и за кој тој побара пари од буџетот од 5,7 милијарди долари. Демократите упорно не попуштаат и не сакаат да го дадат нивното зелено светло за оваа намена. Изградбата на овој ѕид е едно од главните ветувања на Трамп.
Во свечената изјава од 8 јануари од Овалната канцеларија, претседателот им рече на Американците дека им се обраќа “затоа што сме сведоци на зголемена хуманитарна и безбедносна криза на јужната граница”.
