Пратеничката и потпретседателка на СДСМ, Јована Тренчевска, на денешната собраниска седница за пратенички прашања го обвини министерот за економија и труд Бесар Дурмиши дека Владата не презема доволно мерки за подобрување на животниот стандард на граѓаните и за заштита на работниците, посочувајќи дека минималната плата не е зголемена на 600 евра и дека нема пакет мерки за социјално ранливите категории.
Таа истакна дека, според неа, македонските работници се соочуваат со пад на животниот стандард и дека нивниот труд не е соодветно вреднуван, особено во услови на зголемени цени на основните производи. Тренчевска оцени дека владините мерки се задоцнети и недоволни, наведувајќи дека поскапувањата на храната и енергенсите директно го оптоваруваат семејниот буџет.
Во своето обраќање, таа се повика и на податоци за состојбата со државниот буџет, тврдејќи дека дефицитот е значително зголемен и дека реализацијата на приходите е ниска, што, како што рече, доведува до дополнително задолжување. Според неа, тоа е причина зошто не се прифаќа предлогот за минимална плата од 600 евра и зошто не се воведуваат пообемни антикризни мерки.
Тренчевска го праша министерот дали причината за отфрлање на зголемувањето на минималната плата и за немањето нов пакет мерки за ранливите категории е недостиг на средства во буџетот и продлабочен дефицит, оценувајќи дека Владата не успева да одговори на економските предизвици.
