Тренерот на Ливерпул, Арне Слот, откри дека е голем почитувач на Новак Ѓоковиќ и дека со него ги мотивира своите фудбалери.
Пред натпреварот на својот тим против Њукасл во сабота (4:1), Холанѓанецот зборуваше со внимателно избрани зборови за Ѓоковиќ:
„Треба да имате почит кон таков спортист. Само на малкумина им е дадено да бидат на толку врвно ниво толку години, но тоа колку тој трае надминува сè. Мислам дека играл во полуфиналето на сите грен слемови во последните неколку сезони, и тоа во своите години… Со сета почит тоа го нагласувам, секако“, рече Слот за „TNT Sports“ и продолжи:
„Кога станува збор за фудбалот, имаме среќа што сме во ерата на Кристијано Роналдо и Лионел Меси. А беше привилегија да се живее во ерата на Роџер Федерер, Рафаел Надал и Ѓоковиќ. И тоа што е уште тука само по себе зборува.“
Гледајќи ги потезите и говорите на Новак, тренерот на Ливерпул учел важни лекции.
„Разговаравме за Мохамед Салах и за тоа што е потребно да се направи за да бидете на врвно ниво секои неколку дена, и тоа толку долго. Ѓоковиќ е вистински пример. Претходно за состаноците во поранешните клубови користев некои негови моменти, било тоа негови говори, видео-клипови или исечоци од неговите тениски натпревари“, рече Слот.
