Три пожари на отворен простор сè уште се активни во Македонија, додека седум се ставени под контрола, а 24 се целосно изгаснати, информира Центарот за управување со кризи.
Според податоците на ЦУК, во периодот од 8 до 9 септември, до 7:30 часот, биле регистрирани вкупно 34 пожари на отворен простор.
Активни се пожарите во општина Струга, на потегот Буринец – Локов – Селце – Елевци, каде што гори нискостеблеста шума, во општина Македонски Брод, кај селото Белица, на местото Кајорец кон селото Брезница, во близина на репетиторот, каде што е зафатена нискостеблеста и мешана шума, како и во општина Чучер-Сандево, кај селото Брест, на местото Рамно, каде што гори мешана шума.
Под контрола се пожарите во селото Бенче во општина Македонски Брод, каде што е регистриран шумски пожар, како и во Тајмиште, на местото Дарда, и над селото Кнежино, на местото Црн Камен, во општина Кичево.
Пожар под контрола има и во селото Печково во општина Гостивар, каде што гори ниска вегетација и нискостеблести растенија, над селото Стиник во општина Ново Село, во селото Бардовци во општина Карпош, каде што горело ѓубре, како и во селото Копаница во општина Сарај, каде што е зафатена шума.
Во изминатото деноноќие се изгаснати 24 пожари на повеќе локации низ земјата. Пожари се регистрирани и изгаснати во општините Ѓорче Петров, Сарај, Крушево, Долнени, Прилеп, Кривогаштани, Валандово, Росоман, Крива Паланка, Гостивар, Врапчиште, Боговиње, Тетово, Желино, Брвеница, Гази Баба, Студеничани, Јегуновце и Куманово.
Меѓу локациите каде што биле регистрирани пожарите се селото Сирково во општина Росоман, селото Осиче во Крива Паланка, селата Падалиште и Балиндол во Гостивар, селото Врапчиште, селото Синичане, селото Гајре и подрачјето во близина на Теќето во Тетово, како и селото Лопате во Куманово.
Пожари биле изгаснати и на повеќе депонии и места со отпад, меѓу кои во Идризово, Студеничани и Жилче, како и кај градските и Новите гробишта во Крушево и Прилеп.
