Трифонов ја исмеа Сиљановска-Давкова поради барањето прашањата да бидат на англиски

Бугарскиот телевизиски водител и лидер на партијата „Има таков народ“, Слави Трифонов, упати остри критики и навредливи коментари кон македонската претседателка Гордана Сиљановска-Давкова, откако таа побарала бугарските новинари да ѝ поставуваат прашања на англиски јазик за полесно да ги разбира.

— реклама —

Во своето обраќање, Трифонов ја нарече „северномакедонската претседателка“ и изјави дека нејзиниот потег бил „срамен“.

„Сѐ е јасно. Историски, географски, емоционално, ментално – сѐ е јасно. И е толку тажно. Но нивната претседателка, споменатата Гордана Сиљановска-Давкова, ме развеселува. Лично мене. И нејзиниот жален обид да ги натера бугарските новинари во Бугарија да ѝ ги поставуваат прашањата на англиски. Тоа е толку срамно“, изјави Трифонов.

— реклама —

Тој најави дека ќе ѝ упати „специјален поздрав“ преку, како што рече, верзија од една од неговите омилени бугарски песни од „македонскиот крај“, која вообичаено ја пеел пред илјадници луѓе.

— реклама —

„Овојпат, меѓутоа, е наменет конкретно за една личност – специјален поздрав за северномакедонската претседателка Гордана“, порача Трифонов.

Неговото обраќање беше пренесено од повеќе бугарски медиуми и предизвика реакции во јавноста, особено поради употребата на терминот „северномакедонска претседателка“ и квалификациите упатени кон шефицата на македонската држава.

— реклама —

Засега нема официјална реакција од Кабинетот на претседателката Гордана Сиљановска-Давкова во врска со изјавите на бугарскиот водител.