Тројца возачи со над 1,50 промили алкохол уапсени во Скопје

Четири лица биле лишени од слобода при засилена сообраќајна контрола во Скопје, од кои тројца управувале возило со повеќе од 1,50 промили алкохол во крвта, а едно лице возело без возачка дозвола.

— реклама —

Акцијата ја спровела Мобилната единица за безбедност на сообраќајот на патиштата при Секторот за сообраќајни работи во текот на ноќта меѓу 17 и 18 октомври, од 21 до 3 часот, на подрачјата на општините Илинден, Гази Баба и Кисела Вода.

— реклама —

При контролата биле откриени вкупно осум возачи кои управувале моторни возила под дејство на алкохол. Тројца од нив биле лишени од слобода поради сомнение за сторено кривично дело „безобѕирно управување со моторно возило“, согласно член 297-а од Кривичниот законик, бидејќи кај нив било утврдено присуство на алкохол над 1,50 промили.

Уште едно лице било лишено од слобода поради истото кривично дело, бидејќи управувало возило без возачка дозвола.

— реклама —

Од МВР информираат дека против сите сторители ќе бидат поднесени соодветни прекршочни и кривични пријави. Од Министерството најавуваат дека засилените сообраќајни контроли ќе продолжат и во наредниот период, со цел зголемување на безбедноста на патиштата.

МВР апелира до возачите да ги почитуваат сообраќајните правила и прописи, да не управуваат возила под дејство на алкохол и со одговорно однесување да придонесат за поголема безбедност на сите учесници во сообраќајот.