Адвокатот Владимир Туфегџиќ остро ги коментираше гужвите на граничните премини и реакциите на дел од возачите поради сообраќајните казни евидентирани во Македонија, оценувајќи дека станува збор за пример на, како што вели, „балканска ирационалност“ и инает кој на крајот им штети токму на самите граѓани.
„Гужвите на граничниот премин од Бугарија кон Грција заради ‘инает’ за прекршочна казна во сообраќај во Македонија е доказ за балканската ирационалност, недостаток на разум, наследен ментален дефект и отпор кон сè што е нормално во нормалниот свет“, напиша Туфегџиќ.
Според него, луѓето самите си создаваат дополнителни проблеми, нервози и часови чекање само за да покажат отпор кон казна или кон институциите.
„Се малтретираш и себе си и фамилија, самиот си создаваш проблеми и нервози за да докажуеш инает“, наведува тој.
Туфегџиќ прави споредба и со поуредените држави, каде, според него, граѓаните имаат поинаков однос кон институциите, судот, полицијата и даночните обврски.
„Таму народот поштува држава, суд и полиција и воспитан е да го има стравот да не се замери со држава“, пишува адвокатот.
Во својата реакција, тој оценува и дека токму ваквиот менталитет е една од причините поради кои голем број луѓе со години ја напуштаат Македонија и други балкански земји.
„Да не се чудиме што огромен број луѓе се иселуваат 20-тина години наназад“, додава Туфегџиќ.
Тој заклучува дека неколку балкански држави, меѓу кои ја вбројува и Македонија, ќе продолжат да остануваат заробени во, како што го нарекува, „балкански примитивизам“, со поголема опседнатост со минатото отколку со иднината.
На крајот, Туфегџиќ иронично додава: „Свакога дана у сваком погледу све више напредујемо“.
