Адвокатот Владимир Туфегџиќ, бранител на Александар Ѓорчевски, реагираше по објавите во дел од медиумите дека таткото на Вања Ѓорчевска „ја напуштил судницата“, оценувајќи дека станува збор за „ноторна невистина“.
Тој појасни дека пред почетокот на денешната јавна седница во Апелациониот суд побарал дозвола од судечкиот совет, по завршување на излагањето на одбраната, тој и Ѓорчевски да ја напуштат судската сала и да не присуствуваат на делот од рочиштето што се однесувал на останатите обвинети.
„Пред почетокот на денешната јавна седница на која беа присутни новинарите, јас како бранител побарав од судечкиот совет дозвола и согласност, по реферирањето на судијата известител, да се започне со образложението на жалбата на обвинителството и одговорот на жалба на одбраната, а по завршувањето на излагањето на одбраната побарав дозвола од судечкиот совет да ја напуштиме судската сала“, напиша Туфегџиќ.
Тој додава дека јавниот обвинител се спротивставил на предлогот, со образложение дека така би се изгубил континуитетот на седницата, но судот по советување го прифатил барањето на одбраната.
„Сето погоренаведено е важно бидејќи никој самоволно не ја напуштил судницата како што се стекнува впечаток и на сето тоа претходеше процедурално барање со почит кон судот“, наведува адвокатот.
Туфегџиќ посочува дека со реакцијата нема намера да влијае врз уредувачката политика, но смета дека јавноста треба да ја знае вистината.
„Да потенцирам, со ова немам намера да влијаам на уредувачката политика, ударни наслови кои влечат лајкови и од петни жили навиваат за повторно судење и осуда на таткото, но сепак треба да се биде реален и да се пренесе вистината, а судот секако и без ова ќе донесе пресуда“, додава Туфегџиќ.
