Турција планира шест нови нуклеарни реактори со моќност од 4.500 мегавати

Турција планира значително проширување на својата нуклеарна енергетска програма, со изградба на шест нови реактори во близина на градот Синоп, на брегот на Црното Море.

— реклама —

Канадската инженерска компанија „АткинсРеалис“ потпиша меморандум за соработка со турската државна компанија „Туркије Нуклеер Енерџи“ за изработка на студија за изводливост на проектот. Канадската компанија предлага изградба на шест реактори од типот „Енхансд Канду 6“, со вкупна моќност од 4.500 мегавати.

— реклама —

Договорот бил потпишан за време на климатскиот самит COP31 во Анталија, а студијата треба да биде завршена до крајот на 2027 година.

Турција истовремено преговара со Канада, Јужна Кореја, Кина и Русија за нови нуклеарни проекти. Покрај електраната во изградба, која ја гради руската компанија „Росатом“, Анкара планира уште две нуклеарни централи.

— реклама —

Јужна Кореја минатата недела потпиша меморандуми за соработка со Турција во енергетскиот сектор и финансирањето нуклеарни проекти.

— реклама —

Канадската технологија „Канду“ се користи во Романија околу 30 години, а компанијата „АткинсРеалис“ поднела понуда и за изградба на нова нуклеарна електрана во Полска. Извршниот директор Ијан Едвардс оценил дека реализацијата на проектите во Полска и Турција би создала нов нуклеарен енергетски екосистем во Источна Европа.