Турски и сомалиски сили го ослободиле бродот MV LUTUF, турски брод кој бил киднапиран од пирати во близина на брегот на Сомалија, соопшти во саботата сомалиското Министерство за одбрана.
Како што пренесува Асошиетед прес (AP), бродот, кој пловел под знамето на Камерун, бил киднапиран на 17 август во регионот Нугал, во сојузната држава Пунтланд.
Според сомалиското Министерство за одбрана, во текот на операцијата биле уништени четири чамци што ги користеле пиратите, а 14 лица за кои се сомнева дека биле пирати биле убиени.
Останатите пирати го напуштиле бродот, овозможувајќи им на турските и сомалиските сили да преземат контрола врз него.
Операцијата била спроведена врз основа на договорот за одбранбена соработка меѓу Сомалија и Турција, чија цел е зајакнување на поморската безбедност, заштита на сомалискиот брег и борба против пиратеријата.
Министерството не соопштило детали за евентуални жртви или за состојбата на членовите на екипажот.
Локалниот старешина Абдулахи Варсаме од заедницата Џифле во областа Годоб Џиран, каде што бил задржан бродот, за AP изјавил дека бродот и неговиот екипаж се ослободени.
Киднапирањето на „MV LUTUF“ повторно ги засили стравувањата од оживување на пиратеријата долж сомалискиот брег.
