Турски и сомалиски специјални сили го ослободиле товарниот брод „МВ Лутуф“, кој бил киднапиран во близина на сомалискиот брег. Во операцијата биле убиени 14 пирати, а ослободени се сите 10 членови на екипажот и двајца обезбедувачи.
Бродот, кој е во сопственост на турска компанија и плови под знамето на Камерун, бил киднапиран на 17 август во близина на регионот Нугал. Напаѓачите го насочиле кон Пунтланд.
Според сомалиското Министерство за одбрана, заедничката операција за ослободување на бродот траела десет дена. Покрај 14-те убиени пирати, биле уништени и четири нивни чамци, додека преостанатите напаѓачи биле принудени да го напуштат бродот.
По ослободувањето, „МВ Лутуф“ безбедно го продолжил пловењето. Во составот на ослободениот екипаж имало турски, шест индиски и еден грузиски државјанин.
Операцијата била спроведена во рамките на договорот за одбранбена соработка меѓу Турција и Сомалија, чија цел е зајакнување на поморската безбедност, заштита на сомалискиот брег и борба против пиратството, тероризмот и шверцот на оружје.
Во последниот период Турција значително го засили своето воено присуство во Сомалија. Турскиот парламент во јули го продолжи мандатот на турските вооружени сили во земјата за уште две години, а Турција обезбедува обука, советување и техничка поддршка за сомалиските сили.
