Турски суд одреди притвор за поранешна министерка, под истрага за тргување со повластени информации

Поранешната турска министерка за семејство и социјална политика, Фатма Бетул Сајан Каја, е приведена со одлука на суд во Истанбул во рамките на истрагата за финансиската криза што ги зафати инвестициските фондови во Турција, пренесува Ројтерс.

— реклама —

Каја, која во периодот од 2016 до 2018 година беше министерка, во септември поднесе оставка од функцијата потпретседателка на владејачката Партија на правдата и развојот (АКП), по што ја напушти партијата. Претставник на опозицијата претходно ја обвини дека остварила огромна добивка од продажба на акции непосредно пред кризата на берзата.

— реклама —

Според турската агенција Анадолија, против неа се води истрага за „кршење на законот за пазарот на капитал“ и „членство во организација основана за извршување кривични дела“. Обвинителството се сомнева дека имала пристап до повластени информации што можеле да влијаат врз цените на финансиските инструменти. Наводно, била во контакт и со Емре Тезмен, поранешен директор на една од компаниите за управување со имот опфатени со скандалот.

Нејзиниот сопруг, Илијас Каја, бил ослободен, но му биле изречени мерки на претпазливост, меѓу кои и забрана за напуштање на земјата.

— реклама —

Во септември, портпарол на главната опозициска партија „Јени“ тврдеше дека сопружниците Каја заработиле околу 2,17 милијарди турски лири, односно 38,64 милиони евра, со продажба на инвестиции чија вкупна вредност била 163 милиони лири или 2,9 милиони евра. Најголем дел од вложувањата бил во акции на бродоградилиштето „Озата Денизџилик“, купени во април годинава.

— реклама —

Цената на акциите на компанијата на почетокот на април изнесувала околу 220 лири, а до 15 септември достигнала 4.980 лири. Сомнежите за манипулација со цените на акциите со кои ретко се тргувало предизвикале криза на ликвидноста, по што на 16 септември следел остар пад на берзата.