Четириесет и осумгодишен жител на Долно Седларце бил лишен од слобода поради сомнение дека неовластено споделувал и објавувал приватни фотографии и видеозаписи со експлицитна содржина од жена од Тетово.
Од МВР информираат дека на 7 септември полициски службеници од Отсекот за компјутерски криминал при СВР Тетово го лишиле од слобода З.Ѓ.(48). Претходно истиот ден, жена од Тетово пријавила дека З.Ѓ. и уште едно лице неовластено споделиле и објавиле нејзини приватни фотографии и видеозаписи со експлицитна содржина, кои потекнувале од периодот кога биле во врска.
Според пријавеното, во изминатите две години З.Ѓ. во повеќе наврати ѝ барал парични средства за да не ги објави снимките.
Со судска наредба бил извршен претрес во неговиот дом, при што биле пронајдени и одземени мобилен телефон и лаптоп компјутер.
З.Ѓ. бил задржан во полициска станица, а по целосното расчистување на случајот ќе следува соодветна пријава поради сомнение за сторено кривично дело по член 152-а во врска со член 24 од Кривичниот законик.
