Триесет и едногодишен државјанин на Македонија е повреден откако во текот на ноќта меѓу саботата и неделата бил удрен од автомобил на патот Масвлакте во Ротердам.
Според холандскиот портал „Хедлајнер“, повредениот по несреќата бил свесен и со возило на Итната медицинска помош бил пренесен во болница. Како мерка на претпазливост, на местото на настанот бил повикан и хеликоптер за итна медицинска интервенција.
Холандската полиција го привела 41-годишниот возач, државјанин на Бугарија, кој исто така се здобил со повреди. Неговото возило е одземено за потребите на истрагата.
Истражните органи утврдуваат како дошло до инцидентот и дали претходно меѓу двајцата имало расправија.
Засега не е познато под кои околности дошло до нивниот контакт, ниту што довело до ескалација на настанот.
