Уапсен главниот уредник на независниот руски медиум „Новаја газета“

Уредникот на рускиот независен весник „Новаја газета“, Сергеј Соколов, денеска беше уапсен во Москва, а истражителите извршија претрес во неговиот дом, соопшти редакцијата, пренесува „Ројтерс“.

— реклама —

Според весникот, Соколов е приведен во рамките на случајот против неговиот колега Олег Ролдугин, кој беше уапсен во април под сомнение за „злоупотреба на лични податоци“. За ова кривично дело во Русија е предвидена затворска казна до 10 години. Ролдугин се наоѓа во домашен притвор и го очекува судењето.

— реклама —

„Новаја газета“ е основана во 1993 година и е позната по истражувачките текстови за корупцијата и критичкото известување за руската политика.

— реклама —

Поранешниот главен уредник на весникот, Дмитриј Муратов, ја подели Нобеловата награда за мир во 2021 година. Тој наградата им ја посвети на шестмина свои колеги кои беа убиени поради својата новинарска работа.

По почетокот на војната во Украина во 2022 година, Русија ги заостри законите за цензура и го зголеми притисокот врз независните медиуми. Според организацијата „Репортери без граници“, во земјата во моментов се затворени 50 новинари и медиумски работници.