Уапсени 12 навивачи на Ајакс во Сплит: Полицијата им одзела ладно оружје и камени блокови

Дванаесет навивачи на холандскиот фудбалски клуб Ајакс биле уапсени во вторникот во Сплит, под сомнение дека подготвувале насилство пред натпреварот против Хајдук во Конференциската лига на УЕФА.

Според хрватските медиуми, навивачите биле приведени во попладневните часови во угостителски објект на сплитското шеталиште. Кај групата, наводно, биле пронајдени ладно оружје и камени блокови.

— реклама —

Засега не е познато дали приведените ќе бидат ослободени пред почетокот на натпреварот или ќе останат во притвор до завршувањето на средбата на стадионот „Пољуд“.

— реклама —

Хајдук и Ајакс треба да играат во четврток, 15 октомври, со почеток во 18:45 часот.

Во пресрет на натпреварот, сплитската полиција упати апел до граѓаните и до вработените во угостителските објекти, продавниците и услужните дејности во центарот на градот да пријавуваат сомнителни ситуации што би можеле да доведат до судири или оштетување имот.

— реклама —

„Доколку забележите проблем, веднаш јавете се на 192“, наведуваат од полицијата.

Од таму предупредуваат дека во градот се очекува присуство на голем број гостински навивачи во пресрет на натпреварот и на денот на неговото одржување. Посебно се апелира сомнителното однесување на групи навивачи во угостителските објекти да се пријави навреме, без да се чека ситуацијата да ескалира.