Уапсени 25 демонстранти на протестот во Лондон: Врховниот суд ја разгледува забраната за „Палестинска акција“

Британската полиција уапси 25 демонстранти на протестот за поддршка на организацијата „Палестинска акција“, одржан пред Врховниот суд, во пресрет на почетокот на расправата по жалбата на една од нејзините основачки, Худа Амори, против одлуката на британската влада да ја прогласи оваа група за терористичка организација.

Некои од демонстрантите носеле транспаренти со пораки поврзани со правото на протест и слободата на изразување, објави Sky News.

На дел од транспарентите биле испишани формулации преземени од објава што новинарката и писателка Сара Хелм, сопруга на советникот за национална безбедност Џонатан Пауел, ја објавила во октомври на социјалната мрежа Икс.

— реклама —

Хелм тогаш напишала: „Боже, помогни ни нам, авторите кои ја поддржуваме Палестина и Палестинска акција“.

Демонстрантите на транспарентите го замениле зборот „автори“ со изразите „обични луѓе“, „студенти“ и „синови на преживеани од Холокаустот“.

Политичарката од Зелената партија, Џени Џонс, оценила дека демонстрантите ги користат истите зборови што ги употребила Хелм и потсетила дека полицијата претходно соопштила дека нејзината објава не го преминала прагот за кривично гонење.

— реклама —

На протестот учествувал и актерот Алфред Енок, познат по улогата во филмскиот серијал „Хари Потер“. Тој држел транспарент со натпис: „Ова е демократија, а не тероризам“.

Како што објави британскиот медиум LBC News, Енок изразил надеж дека забраната за организацијата „Палестинска акција“ ќе биде укината. Тој оценил дека забраната има застрашувачки ефект врз граѓаните и дека претставува дел од поширокото ограничување на правото на протест, кое е основа на демократијата.

— реклама —

За време на расправата пред Врховниот суд, адвокатот на Худа Амори, Раза Хусеин, изјавил дека целите на организацијата „Палестинска акција“ биле „во согласност со либералните демократски вредности, а не спротивни на нив“.

Во писмените поднесоци тој навел дека од вкупно 385 акции што групата ги спровела во текот на пет години, само три биле оценети како активности што ја исполнуваат законската дефиниција за тероризам, и тоа исклучиво поради сериозно оштетување на имот.

Хусеин оценил дека со забраната практично била уништена протестна организација која уживала широка поддршка кај делови од граѓанското општество.

— реклама —

Од друга страна, адвокатот на британското Министерство за внатрешни работи, Џејмс Еди, изјавил дека Апелацискиот суд не направил правна грешка кога одлучил дека забраната треба да остане во сила.

Тој навел дека Апелацискиот суд го отфрлил обидот на Амори да ја претстави „Палестинска акција“ како ненасилна организација која спроведува директни протестни акции.

Според него, забраната за „Палестинска акција“ не го спречува јавното изразување поддршка за Палестина, ниту противењето на Израел и израелските одбранбени сили, туку се однесува исклучиво на директното изразување поддршка за самата организација.