Уапсени тројца мажи и тројца полицајци по исчезнувањето на маж во Белград

Белградската полиција уапси тројца мажи – Н.Л., С.М. и М.С. – по исчезнувањето на А.Н., а обвинителството се сомнева дека мажот е убиен, соопшти Вишото јавно обвинителство во Белград.

Поради сомнение за соучесништво уапсени се и тројца полицајци – Б.М. (41), С.С. (33) и П.П. (47), кои се товарат за непријавување кривично дело и сторител.

— реклама —

Според обвинителството, Н.Л. е сопственик на локалот на Сењак во кој А.Н. последен пат бил виден.

А.Н. сè уште не е пронајден, а по апсењето на С.М. и М.С. во ресторанот биле пронајдени две чаури и траги од крв кои му припаѓаат на исчезнатиот маж.

— реклама —

Неговото исчезнување го пријавила невенчаната сопруга Ј.М., која последен пат се слушнала со него на 12 мај околу 23 часот, кога престојувал во ресторан на Сењак и се сретнал со пријатели.

— реклама —

„По 23 часот А.Н. престанал да ѝ се јавува, а мобилниот телефон бил исклучен“, се наведува во соопштението.

Во контејнер спроти локалот бил пронајден мобилен телефон „ајфон“ со непознат сопственик.

На осомничените им е одреден притвор до 48 часа, по што ќе бидат изведени на сослушување во Вишото јавно обвинителство во Белград.

Истрагата продолжува, а полицијата и натаму трага по исчезнатиот А.Н.