Уапсени тројца осомничени за продажба на повеќе од 100 фалсификувани дипломи

Српската полиција уапси тројца осомничени членови на организирана криминална група која, според истрагата, со години изработувала и фалсификувала образовни документи, меѓу кои дипломи за средно, вишо и високо образование.

Акцијата ја спровеле припадници на Управата на криминалистичката полиција, во соработка со службите за борба против организиран криминал и корупција, по налог на Обвинителството за организиран криминал.

— реклама —

Уапсените Ј. А. (1986), Д. Р. (1981) и В. М. (1974) се сомничат за здружување заради вршење кривични дела и фалсификување исправи во продолжен временски период. Двајца од нив се товарат и за злоупотреба на службената положба.

Кривичната пријава опфаќа уште двајца осомничени, меѓу кои и организаторот Б. Д. (1974), одговорно лице во средно училиште во Нови Пазар. Тие веќе се наоѓаат во притвор.

— реклама —

Според сомневањата на истражните органи, од октомври 2021 до јуни 2026 година, во нелегална печатница на територијата на Белград биле изработени повеќе од 100 фалсификувани документи. Меѓу нив имало свидетелства, дипломи за различни степени на образование, уверенија за положени испити и магистерски дипломи, наменети да бидат употребени како вистински и законски стекнати документи.

— реклама —

На овој начин, осомничените, според истрагата, за себе и за криминалната група прибавиле противправна имотна корист од околу 20 милиони динари.

Според сомневањата, Д. Р., кој работел како административен службеник во училиштето во Нови Пазар, ги пречекорил своите овластувања и издавал фалсификувани свидетелства, дипломи и уверенија на повеќе лица. В. М., пак, пронаоѓал заинтересирани лица и ги доставувал нивните податоци и документација за изработка на лажните исправи.

— реклама —

Во тек се претреси на повеќе локации во Белград, Нови Пазар и Рашка. Досега биле пронајдени десетици фалсификувани документи, дипломи и уверенија, како и пари.

На осомничените им е одреден притвор до 48 часа, по што со кривична пријава ќе бидат изведени пред надлежното обвинителство.