Убиството на 53-годишниот бугарски бизнисмен Илијан Филипов ја вознемири јавноста во Бугарија, откако тој во текот на ноќта бил застрелан во Пловдив. Филипов беше сосопственик на една од најголемите транспортни компании во земјата, „ПИМК“, а воедно и сопственик на фудбалскиот клуб Ботев Пловдив.
Според првичните информации од истрагата, нападот бил извршен со огнено оружје, при што Филипов бил погоден во пределот на главата. Инцидентот бил пријавен околу 1 часот по полноќ.
По пријавата, бугарското Министерство за внатрешни работи презело голема полициска операција во Пловдив. Биле блокирани влезовите и излезите од градот, додека полициските екипи започнале потрага по сторителот.
Истрагата засега ги разгледува сите можни мотиви и верзии за убиството. Според првичните проценки на истражителите, начинот на кој бил извршен нападот укажува на организирана и однапред подготвена акција.
Филипов беше добро познат во бугарскиот бизнис-сектор. Компанијата „ПИМК“ со години е присутна во транспортот и логистиката, а неговите деловни активности опфаќале и градежништво и железнички сообраќај.
Во јуни 2023 година, Филипов го презеде управувањето со Ботев Пловдив, по што вложи значителни средства во клубот и неговата инфраструктура.
Полициските екипи продолжуваат со увидот и собирањето докази. За денеска е најавен вонреден брифинг на обвинителството и МВР во Пловдив, на кој се очекуваат дополнителни информации за околностите и мотивот за убиството.
